Экскурсія ў горад Мінск

 Літаратурны музей Максіма Багдановіча –  гэта адзін з самых прыгожых музеяў нашай краіны. Ён размешчаны ў двухпавярховым будынку ў Троіцкім прадмесці, недалёка ад месца , дзе нарадзіўся паэт. У доме, які пазбаўлены  мемарыяльнасці, з дапамогай экспанатаў і мастацкіх прыёмаў, утвораны непаўторны паэтычны свет паэта і яго жыццёвы шлях.

Невялікі мост з Троіцкага прадмесця вядзе на “Востраў Мужнасці і Скрухі”, да мемарыялу, прысвечанаму воінам-інтэрнацыяналістам, якія загінулі  ў Афганістане  ў 1979-1989 гг. Каля ўваходу –  тэкст, які раскрывае прызначэнне мемарыялу: “Сынам, якія загінулі ў Афганістане, узведзены гэты храм. Каб зла не было ні на сваёй, ні на чужой зямлі”.

Сапраўднай аздобай Мінска з’яўляецца  Цэнтральны батанічны сад , які размешчаны пасярод гарадскіх джунгляў.  Ён быў адкрыты ў 1932 годзе пры НАН Беларусі. Гэта адзін з самых вялікіх батанічных садоў Еўропы. Яго плошча – 92 гектары. У калекцыі сада  больш за 15 тысяч найменняў  раслін. Асаблівую цікавасць  выклікае  аранжарэя з 600 відамі трапічных раслін, а таксама адзіны ў Беларусі ліманарый, дзе прадстаўлена 60 сартоў лімонаў, 15 сартоў апельсінаў, 10 сартоў грэйпфрутаў.

Навучэнцы атрымалі сапраўдную асалоду ад наведвання цікавых мясцін нашай сталіцы. Яны з захапленнем і ўзрушанасцю дзяліліся ўражаннямі  і   станоўчымі эмоцыямі.

Аксана Валянцінаўна Двужыльная, класны кіраўнік 6 “Б” класа